Ինչպես ապահովել «առողջ ափսե» ընտանիքի համար. Մի քանի պարզ խորհուրդ

Առավոտյան հոգնածությունը, էներգիայի պակասը, վատ տրամադրությունը ընկճված իմունային համակարգի նշաններ են: Սննդաբան Արևիկ Պետրոսյանը Aysor.am-ի հետ զրույցում ասում է՝ իմունային համակարգի գլխավոր գործընկերներից է բալասնավորված սննդակարգը.

«Կարևոր է սեփական օրգանիզմը լավ ճանաչել, հասկանալու համար, թե որ մթերքն ինչ չափով, ինչպես է յուրացնում օրգանիզմը»:

Սննդաբանը խորհուրդ է տալիս սնվել ըստ սեզոնայնության.

Ձմռանը սպիտակուցային մթերքն ավելի լավ է յուրացվում օրգանիզմի կողմից, փոխարենը ամռանը միսը, ոչ ֆերմենտավորված կաթնամթերքը ծանրության զգացում են առաջացնում:

Տաք եղանակի նախընտրելի մթերքներն, իհարկե, միրգ, բանջարեղենն են: Մեր երկրի աշխարհագրությունը օգնում է առողջ սնվելու մշակույթի հարցում. վայրի կանաչեղենի պաշարների առատությունը թույլ է տալիս օրինակ դեղաբույս համարվող փիփերթն օգտագործել խոհանոցում:

Միրգն ու բանջարեղենը հատկապես համավարակի պայմաններում առավել խրախուսելի են. նվազեցնում են օրգանիզմում բորբոքային գործընթացը, մրսածության, վիրուսային հիվանդությունների դեպքում խուսափել է պետք ոչ ֆերմենտավորված կաթնամքթերքից, մսից. սրանք խթանում են օրգանիզմում բորբոքայնության գործընթացը:

Առողջ ափսեն՝ ըստ սննդաբան Արևիկ Պետրոսյանի

Սննդի բազմազանությունն առողջ ափսեի գլխավոր պայմանն է. ափսեի մեջ պետք է հավասարաչափ բաշխվեն վիտամիններ, սպիտակուցներ, ածխաջրեր, ճարպեր պարունակող մթերքները: Ամեն օրվա ափսեն պետք է հագեցնի օրգանիզմը բոլոր անհրաժեշտ տարրերով, շաբաթը մեկ-երկու անգամ կարելի է բացառություն անել՝ ափսեի մեջ ավելացնել «հաճույքի» ուտելիքներ, որ հիմնականում բարձր կալորիականության են:

Ածխաջրեր

Առողջության համար առավել օգտակար են համարվում բարդ ածխաջրերը։ Յուրացվում են դանդաղ, արյան մեջ շաքարի քանակը չեն մեծացնում: Բարդ ածխաջրեր պարունակող մթերքներ՝

Վարսակ
Հնդկաձավար
Սիսեռ
Ամբողջական ցորենի հաց
Ճարպեր

Օրգանիզմի աշխատանքի երաշխավորներից են, օգնում են վիտամիններ, միներալների ճիշտ ներծծման հարցում: Կան կենդանական և բուսական ծագման ճարպեր:

Ընդունված է ամենից օգտակար ճարպեր համարել ընդեղենի, սերմերի յուղերը, ինչպես նաև ձիթայուղը, ավոկադոյի յուղը:

Մկանային աշխատանքի, արյան մակարդելիության համար օրգանիզմին խիստ անհրաժեշտ են պոլի-չհագեցած ճարպեր, որ լինում են Օմեգա-3 և Օմեգա-6 ճարպաթթուներ պարունակող: Օմեգա 3-ով հարուստ են ծովամթերքը, ընդեղենը, սերմերը: Օմեգա 6 պարունակում են խաղողի կորիզի յուղը, ընկույզի յուղը, արևածաղկի յուղը:

Սպիտակուցները հյուսվածքների, մկանների կառուցման, վերականգնման լավագույն գործընկերն են, սպիտակուցների աղբյուր են համարվում ՝

Մսամթերք
Ծովամթերք
Թռչնամիս
Կաթնամթերք
Լոբազգիներ
Ընդեղեն
Սերմեր
Վիտամիններն անփոխարինելի են օրգանիզմի նյութափոխանակության, կենսագործունեության համար:

A վիտամին կարևոր է տեսողության համար, պարունակում են կենդանիներ, ձկների լյարդը, խավիարը, ձվի դեղնուցը, գազարը, լոլիկը, մասուր, կարմիր տաքդեղը:
B խմբի վիտամիններ անհրաժեշտ են հատկապես ածխաջրերի յուրացման հարցում, նպաստում են առողջ մաշկ ունենալուն: B վիտամիններ հայտնաբերվում են՝ ձկնեղեն, միս, ձու, կանաչ տերևավոր բանջարեղեն, սիսեռ, լոբեղեն:
C վիտամինինի առավելագույն քանակություն կա մասուրում, սև հաղարջում, նարնջում, կիտրոնում, կարմիր տաքդեղում:
D վիտամինի աղբյուր են ձկների կյարդի ճարպը, ձկան յուղը, ոչ մեծ քանակությամբ՝ ձվի դեղնուցը:
E վիտամին պարունակում են գազարը, լոլիկը, սպանախը, կաղամբը, եղինջը: