ՀՀ վարչապետ Նիկոլ Փաշինյանն այսօր մանրամասնեց, թե ինչ է իրենից ներկայացնում հայ-ադրբեջանական սահմանին զորքերի հայելային հետքաշման գաղափարը:
Վարչապետը հիշեցրեց, որ 2021 թվականի նոյեմբերի 26-ին Սոչիում ընդունված եռակողմ հայտարարության մեջ, որը ստորագրված է ՌԴ նախագահի, Ադրբեջանի նախագահի ու ՀՀ վարչապետի կողմից, արձանագրված է, որ կողմեը պայմանավորվել են քայլեր ձեռնարկել հայ-ադրբեջանական սահմանին անվտանգության կայունության ու բարձրացման ուղղությամբ ու գործը տանել դեպի դելիմիտացիայի ու դեմարկացիայի հանձնաժողովի ձևավորում:
«Մենք գրել ու ստորագրել ենք, որ նախ պետք է քայլեր ձեռնարկենք անվտանգության ու կայունության ուղղությամբ հայ-ադրբեջանական սահմանին, որից հետո գործը տանենք դեպի դեմարկացիայի ու դելիմիտացիայի հանձնաժողով: Մենք պետք է տեր կանգնենք մեր իսկ պայմանավորվածությանը, մենք առաջարկ ենք արել, մեր պատկերացումը հետևյալն է՝ Զինված ուժերը պետք է հայելային հետ քաշվեն. ի՞նչ է նշանակում հայելային հետքաշում, նշանակում է, որ հայ-արդբեջանական սահմանագծից հավասար հեռավորության վրա պետք է հետ քաշվեն, որից հետո սահմանի պահպանությունը պետք է հանձնվի սահմանափակ թվով սահմանապահ ծառայության ծառայողների ու արդյունքում պետք է տեղի ունենա միջազգային մոնիթորինգ՝ ձեռք բերված պայմանավորվածությունները կյանքի կոչելու իմաստով», — հայտարարեց Փաշինյանը:
Նա ասաց, թե Հայաստանի ու Ադրբեջանի միջև գոյություն ունի պետական սահման, քանի որ Հայաստանի ու Ադրբեջանի միջև դեռևս Խորհրդային ժամանակներում գոյություն է ունեցել սահման, որը դելիմիտացիայի է ենթարկվել, իսկ 1991 թվականի «Անկախ պետություների համագործակցության կազմակերպություն ստեղծելու մասին» համաձայնագրով, որը վավերացվել է և Հայաստանի, և Ադրբեջանի խորհրդարանների կողմից, այդ սահմանները ճանաչվել են, հետևաբար, Հայաստանը կարծում է, որ այս պայմանավորվածությունները պետք է իրագործվեն այս տրամաբանությամբ:
«Մենք պատրաստ ենք լսել նաև այլ առաջարկներ, այլ պատկերացումներ, ու մեր խնդիրն է, որ և միջազգային հանրությունը, և հայ հանրությունը տեղեկանա, թե ինչի մասին է խոսքը, որովհետև այս թեմայով, ցավոք սրտի, կան բազմաթիվ անհիմն շահարկումներ այն մասին, որ գյուղերը անպաշտպան են մնալու և այլն. չկա այդպիսի բան, բնականաբար, առաջարկների փաթեթում ամեն ինչ հաշվի է առնված, բայց նաև պետք է խոստովանել մի բան, որ այդ առաջարկը, որը մենք անում ենք, ինքը այնպես չէ, որ լիարժեք, 100 տոկսով կոմֆորտ է Հայաստանի համար կամ դիսկոմֆորտ է Ադրբեջանի համար. կա սահմանային գիծ ու կարծում ենք, որ այդ սահմանային գծով պետք է հետքաշում տեղի ունենա, ընդ որում, արձանագրելով, որ սա չի կանխորոշում հետագա դեմարկացիայի արդյունքները, այլ դա պետք է լինի համապատասխան բանակցությունների առարկա», — ասաց ՀՀ վարչապետը:
Նա նշեց, այս առաջարկները հիմնված են լեգիտիմ ու օրինական արձանագրումների վրա:
«Կարծում եմ, որ այս իրավիճակի ոչ ճիշտ մեկնաբանությունը որոշ ուժեր կարող են օգտագործել սահմանին նոր էսկալացիաներ հրահրելու համար», — ընդգծեց Նիկոլ Փաշինյանը:
