Ինչպես կառավարել ժամանակը, արդյունավետ աշխատել և շատ բան հասցնել՝ սա արդիական խնդիր է բոլորի համար, ովքեր ցանկանում են հեշտությամբ հասնել նպատակներին, կատարելագործվել և վաստակել: Ամեն օր պլաններ կազմելու, ժամերը, րոպեները գնահատելու անկարողության պատճառով կորցնում ենք մեր ամենաթանկ ռեսուրսը՝ ժամանակը։
Aysor.am-ը օրվա և աշխատանքի գրագետ պլանավորման, ամեն ինչ հասցնելու խնդրի շուրջ զրուցել է ժամանակի կառավարման մասնագետ Լիլիթ Սողոմոնյանի հետ։
«Ժամանակի կառավարման գրեթե բոլոր գոյություն ունեցող մեթոդները բաղկացած են երեք բաղադրիչներից՝ առաջնահերթություն, պլանավորում և կառուցվածք: Յուրաքանչյուր աշխատանք կատարելիս, նախևառաջ պետք է որոշել, թե որքանով է այն հրատապ, բարդ և կարևոր, և միայն դրանից հետո շարունակել դրա իրականացումը», — ասաց մասնագետը:
Լիլիթ Սողոմոնյանն անդրադարձավ նաև օրվա պլանավորման կարևորությանն ու կառուցվածքին. պետք է հստակ հասկանալ, թե երբ սկսել աշխատանքը և որքան ժամանակ կպահանջի դրա կատարումը: Կարևոր է նաև հետևել գործողության առաջընթացին և արդյունքներին։
«Ամեն օր փորձեք կատարել մեկ մեգակարևոր առաջադրանք, 3 միջին հրատապության և 5 փոքր առաջադրանքներ: Սկզբում գուցե դժվար լինի, սակայն այն սովորություն դարձնելով մեծ հաջողություն կգրանցեք», — խորհուրդ տվեց մասնագետը։
Աշխատանքը նշված ժամկետում կատարելու համար, հարկավոր է հստակ ժամկետներ սահմանել. վերջնաժամկետները խրախուսում են ավելի արագ աշխատել և օգնում կանխել հետաձգումը:
Լիլիթ Սողոմոնյանն առաջարկում է օգտագործել աշխատանքի կազմակերպման հայտնի մեթոդներից մեկը, որը նախատեսված է մարդկանց միջև ծանրաբեռնվածությունը բաշխելու և աշխատանքը ճիշտ ժամանակին կատարելու համար: Այն իրենից ներկայացնում է աղյուսակ երեք սյունակներով՝ Անելիքներ, Ընթացքի մեջ և Կատարված: Մեթոդն օգնում է տեսնել աշխատանքի աճող տեմպը և ոչինչ չմոռանալ։
