Գեներալ Օգանովսկին ձերբակալվել է… Մանրամասներ

Երեկ երեկոյան՝ ժամը 19:00-ի սահմաններում, Ստեփանակերտ քաղաքի «Վերածննդի» հրապարակում հնչել են կրակոցներ, որի հետևանքով վնասվել էր Ստեփանակերտ քաղաքի բնակչին պատկանող ավտոմեքենան:

Արցախի դատախազությունից հայտնում են, որ դեպքի առթիվ ձեռնարկված քննչական և դատավարական գործողությունների արդյունքների հիման վրա ԱՀ քննչական կոմիտեի քննիչի կողմից հարուցվել է քրեական գործ ԱՀ քրեական օրենսգրքի 269-րդ հոդվածի 4-րդ մասով (խուլիգանություն, որը կատարվել է զենքի կամ որպես զենք օգտագործվող առարկաների գործադրմամբ) և 245-րդ հոդվածի 1-ին մասով (ապօրինի կերպով հրազեն ձեռք բերելը, պահելը, փոխադրելը կամ կրելը) նախատեսված հանցանքների հատկանիշներով:

Ենթադրյալ հանցագործության կատարման կասկածանքով ձերբակալվել է Արցախի Հանրապետության քաղաքացի Ս.Կ.-ն:

Կատարվում է նախաքննություն, որի ընթացքի ու արդյունքների մասին կտրվի հավելյալ տեղեկություն:

Լրատվամիջոցների տեղեկություններով՝ Ս.Կ.-ն գեներալ Սամվել Կարապետյանն է՝ Օգանովսկին։

Ինչպես հայտնում են 24News-ի աղբյուրները, մի քանի երիտասարդ կայանել են իրենց մեքենան Ազատամարտիկների միության շենքի մոտ, որը գտնվում է Վերածննդի հրապարակում, որից հետո Կարապետյանը հրահանգել է այն դուրս բերել։ Երիտասարդների հետ սկսվել է լեզվակռիվ, որն ավարտվել է կրակոցներով։ Օգանովսկին սկսել է կրակել կայանված մեքենայի վրա։