Ձուն չի կարելի պահել սառնարանի դռան վրա. իսկ ինչպե՞ս պահել

Doctors.am-ը գրում է. Պարզվում է՝ ձուն չի կարելի պահել սառնարանի դռան վրա:

Եթե ձուն պահում եք սառնարանի դռան վրա, ամեն անգամ սառնարանի դուռը բացելիս ձվերը շփվում են տաք օդի հետ և փչանում:

Ձվի մեջ առկա սպիտակուցների, ածխաջրերի, վիտամինների և հանքանյութերի համադրությունը կատարյալ է: Մայրական կաթից հետո ձուն երկրորդ կարևոր սննդամթերքն է երեխայի համար:

Կարևոր է նշել , որ հում ձուն բավականին հաճախ պարունակում է նաև վնասակար մանրէներ: Հում ձու երեխային տալ չարժե: Հում սպիտակուցները ավելի դժվար են մարսվում:

Նախընտրելի է օգտագործել խաշած ձու, որի սպիտակուցները ներծծվում են 100%-ով: Տապակած ձուն վատ չի ներծծվում, բայց տապակածն ինքնին վնասակար է, քանի որ տապակելիս սննդամթերքը ստանում է քաղցկեղածին հատկություններ:

Ձվի թարմությունը կարելի է ստուգել հետևյալ կերպ. ձուն գցեք ջրի մեջ, եթե սուզվեց, ապա այն թարմ է: Ձվի տափակ հատվածում գազեր են հավաքվում: Ժամանակի ընթացքում, ձվի հնանալուն զուգահեռ, գազերի քանակն ավելանում է, նրա խտությունը մեծանում է և ձուն կամ լողում է ջրի երեսին, կամ շատ դանդաղ է իջնում:

Ինչպես պահպանել ձուն

Ձուն 6 շաբաթից ավել պահել խորհուրդ չի տրվում` նույնիսկ սառնարանում: Ձուն ճիշտ է դնել բութ հատվածը դեպի վերև, որպեսզի գազային բուշտը չանցնի ձվի միջով: Ճիշտ կլինի ձուն պահել ոչ թե սառնարանի դռան վրա, այլ սառնարանի խորքում՝ հետին պատի մոտ, ամենասառը հատվածում: